ಕ್ಯೂ ಆರ್ ಕೋಡ್ ಎಂದರೇನು?

ನೀವು ಒಂದು ಅಂಗಡಿಯಲ್ಲಿ ಫೋನ್ ನಿಂದ ಹಣ ಕೊಡಲು ಅಥವಾ ಯಾವುದೋ ಜಾಹಿರಾತಲ್ಲೋ ಇಲ್ಲಾಂದ್ರೆ ವಿಸಿಟಿಂಗ್ ಕಾರ್ಡ್ ಅಲ್ಲಿ, ಕೆಲವೊಮ್ಮೆ ಆಮಂತ್ರಣ ಪತ್ರಿಕೆಯಲ್ಲಿ ಚಿಕ್ಕ ಚಿಕ್ಕ ಚೌಕ ಹೊಂದಿರುವ ಸ್ಕ್ಯಾನಿಂಗ್ ಕೋಡ್ ನೀವು ನೋಡಿರಬಹುದು.

ಕ್ಯೂ ಆರ್ ಕೋಡ್ ಮೊದಲು ಕಂಡು ಹಿಡಿದಿದ್ದು ಜಪಾನ್ ನಲ್ಲಿ.

ಕ್ಯೂ ಆರ್ ಕೋಡ್ ಪೂರ್ಣ ಹೆಸರೇನು?

ಅದನ್ನು ಕ್ಯೂ ಆರ್ ಕೋಡ್ ಎಂದು ಕರೆಯುತ್ತಾರೆ. ಕ್ಯೂ ಆರ್ (QR) ಎಂದರೆ ಕ್ವಿಕ್ ರಿಸ್ಪಾನ್ಸ್ (Quick Response) ಕೋಡ್ ಇದರ ಪೂರ್ಣ ಹೆಸರು. ಅಂದರೆ ಶೀಘ್ರವಾಗಿ ಪ್ರತಿಕ್ರಿಯೆ ನೀಡುವ, ತಡ ಮಾಡದೇ ಉತ್ತರ ನೀಡುವ ಎಂದರ್ಥ.

ಕ್ಯೂ ಆರ್ ಕೋಡ್ ಇತಿಹಾಸ

೧೯೯೪ರಲ್ಲಿ ಟೋಯೋಟಾದ ಭಾಗವಾದ ಡೆನ್ಸೋ ವೇವ್ (Denso Wave) ಎಂಬ ಜಪಾನಿ ಕಂಪನಿ ಕ್ಯೂ ಆರ್ ಕೋಡ್ ಅನ್ನು ಕಂಡು ಹಿಡಿಯಿತು. ಮೊದಲು ನಿರ್ಮಾಣದ ಸಮಯದಲ್ಲಿ ವಾಹನ ಟ್ರ್ಯಾಕ್ ಮಾಡಲು ಬಳಸಲಾಗುತಿತ್ತು.

ಕ್ಯೂ ಆರ್ ಕೋಡ್ ಒಂದು ಓಪನ್ ಸ್ಟಾಂಡರ್ಡ್ (ತೆರೆದ ಮಾನದಂಡ) ಆಗಿದೆ.

ಡೆನ್ಸೋ ವೇವ್ ಕ್ಯೂ ಆರ್ ಕೋಡ್ ಅನ್ನು ಸಾರ್ವಜನಿಕ ಉಪಯೋಗಕ್ಕೆ ಬಿಟ್ಟು ಕೊಟ್ಟಿದೆ, ಯಾವುದೇ ಪೇಟೆಂಟ್ ಮಿತಿ ಹಾಕಿಲ್ಲ. ಅದೂ ಕೂಡ ವ್ಯಾಪಕ ಬಳಕೆಗೆ ಕಾರಣ.

ಕ್ಯೂ ಆರ್ ಕೋಡ್ ಹೇಗಿರುತ್ತದೆ?

ಕ್ಯೂ ಆರ್ ಕೋಡ್ ಅಲ್ಲಿ ಬಿಳಿಯ ಬಣ್ಣದ ತೆರೆಯ ಮೇಲೆ ಕಪ್ಪು ಬಣ್ಣದ ಚಿಕ್ಕ ಚಿಕ್ಕ ಚೌಕಗಳನ್ನು ಒಂದು ಚೌಕದ ಆಕಾರದಲ್ಲಿ ಜೋಡಿಸಲಾಗಿರುತ್ತದೆ.

ಈ ಕೋಡ್ ಲಂಬವಾಗಿ (ಮೇಲಿನಿಂದ ಕೆಳಗೆ) ಅಗಲವಾಗಿ (ಎಡದಿಂದ ಬಲಕ್ಕೆ) ಎರಡೂ ದಿಕ್ಕಿನಲ್ಲಿ ಮಾಹಿತಿ ಉಳಿಸುವ ಸಾಮರ್ಥ್ಯ ಹೊಂದಿದೆ.

ನಿಮ್ಮ ಕೈಯಲ್ಲಿರೋ ಸ್ಮಾರ್ಟ್ ಫೋನ್ ತೆಗೆದು ಅದರಲ್ಲಿ ಕ್ಯಾಮೆರಾ ಎಪ್ ತೆಗೆದು ಒಮ್ಮೆ ಈ ಮೇಲಿನ ಕ್ಯೂ ಆರ್ ಕೋಡ್ ತೋರಿಸಿ. ಎಲ್ಲ ಸರಿಯಾಗಿದ್ದರೆ ನಿಮಗೆ ಮಸ್ತಕಮಣಿ.ಕಾಂ ವೆಬ್ ತಾಣದ ವಿಳಾಸ ಗೋಚರಿಸುತ್ತದೆ!

ಕ್ಯೂ ಆರ್ ಕೋಡ್ ಏನನ್ನು ಉಳಿಸಬಹುದು?

ಕ್ಯೂ ಆರ್ ಕೋಡ್ ಒಂದು ಎರಡು ಆಯಾಮದ (ಟು ಡೈಮೆನ್ಶನಲ್) ಮೆಟ್ರಿಕ್ಸ್ ಬಾರ್ ಕೋಡ್ ಆಗಿದ್ದು ಇದರಲ್ಲಿ ಬರಹ / ಪಠ್ಯವನ್ನು, ವೆಬ್ ವಿಳಾಸವನ್ನು, ವಿಳಾಸವನ್ನು, ಮ್ಯಾಪ್ ಲೊಕೇಶನ್ ಅಂದರೆ ಸ್ಥಳದ ಮಾಹಿತಿ, ವಸ್ತುಗಳ ಮಾಹಿತಿ ಅಥವಾ ಇನ್ನಿತರ ಮಾಹಿತಿ ಕೂಡಾ ಉಳಿಸಬಹುದು.

ಕ್ಯೂ ಆರ್ ಕೋಡ್ ನಲ್ಲಿ ಬಾರ್ ಕೋಡ್ ಗಿಂತ ಜಾಸ್ತಿ ಮಾಹಿತಿಯನ್ನು ಉಳಿಸಬಹುದು ಅಷ್ಟೇ ಅಲ್ಲ ಚಿಕ್ಕ ಗಾತ್ರದಲ್ಲಿ ಮುದ್ರಿಸಿದರೂ ಅದನ್ನು ಕ್ಯೂ ಆರ್ ಕೋಡ್ ಸ್ಕ್ಯಾನರ್ ಓದಬಲ್ಲುದು.

ಕ್ಯೂ ಆರ್ ಕೋಡ್ ಓದುವದು ಹೇಗೆ?

ಕ್ಯೂ ಆರ್ ಕೋಡ್ ಅನ್ನು  ಸ್ಮಾರ್ಟ್ ಫೋನ್ ಅಥವಾ ಡಿಜಿಟಲ್ ಕ್ಯೂ ಆರ್ ಕೋಡ್ ರೀಡರ್ ಬಳಸಿ ಸ್ಕ್ಯಾನ್ ಮಾಡಿ ಅದರಲ್ಲಿರುವ ಸಂಕೇತವನ್ನು ಸುಲಭವಾಗಿ ಬಿಡಿಸಲು ವಿನ್ಯಾಸ ಮಾಡಲಾಗಿದೆ.

ಕ್ಯೂ ಆರ್ ಕೋಡ್ ಅನ್ನು  ಸುಲಭವಾಗಿ ಸ್ಕ್ಯಾನ್ ಮಾಡಬಲ್ಲ ಸ್ಮಾರ್ಟ್ ಫೋನ್ ಬಳಕೆ ಹೆಚ್ಚಿದ ಹಾಗೆ ಕ್ಯೂ ಆರ್ ಕೋಡ್ ನಲ್ಲಿ ಇರುವ ಮಾಹಿತಿ ಪಡೆಯುವದು ಸುಲಭ ಆಗಿದೆ. ಇದರಿಂದ ಈ ಡಿಜಿಟಲ್ ಯುಗದಲ್ಲಿ ಕ್ಯೂ ಆರ್ ಕೋಡ್ ನಮ್ಮ ಪ್ರತಿದಿನದ ಜೀವನದ ಭಾಗವಾಗಿ ಬಿಟ್ಟಿದೆ.

ಕ್ಯೂ ಆರ್ ಕೋಡ್ ಬಳಕೆ ಎಲ್ಲೆಲ್ಲಿ?

ಇವನ್ನು ಮಾರ್ಕೆಟಿಂಗ್, ಹಣ ಸಂದಾಯಕ್ಕೆ, ಟಿಕೆಟ್ ಗಳಲ್ಲಿ, ವಸ್ತುಗಳ ಪ್ಯಾಕಿಂಗ್ ಗಳ ಮೇಲೆ ಹಾಗೂ ವಸ್ತುಗಳ ಪಟ್ಟಿ ಮಾಡಲು ಹೀಗೆ ಹಲವು ಬಗೆಗಳಲ್ಲಿ ಬಳಸಲಾಗುತ್ತದೆ.

ಕೊನೆಯ ಮಾತು

ಕ್ಯೂ ಆರ್ ಕೋಡ್ ಜಪಾನಿನಲ್ಲಿ ಕಂಡು ಹಿಡಿದ ೨ನೆ ಆಯಾಮ ಮೆಟ್ರಿಕ್ಸ್ ಕೋಡ್ ಆಗಿದ್ದು ಸ್ಮಾರ್ಟ್ ಫೋನ್ ಬಳಸಿ ಮಾಹಿತಿ ಓದಬಹುದು. ಬ್ಯುಸಿನೆಸ್ ಕಾರ್ಡ್, ಟಿಕೆಟ್, ಹಣ ಸಂದಾಯ ಹೀಗೆ ಹಲವು ಕಡೆ ಇದು ಉಪಯೋಗಕ್ಕೆ ಬಳಕೆ ಆಗುತ್ತಲಿದೆ.