ಕ್ಯೂ ಆರ್ ಕೋಡ್ ಇತಿಹಾಸ

ಬಹುಶಃ ನಮಗೆ ಭಾರತದಲ್ಲಿ ಈ ಕ್ಯೂ ಆರ್ ಕೋಡ್ ಸಾರ್ವಜನಿಕರಿಗೆ ಪರಿಚಯ ಆಗಿದ್ದೇ ವೆಬ್ ತಾಣದ ವಿಳಾಸ, ಮ್ಯಾಪ್ ಲೊಕೇಶನ್ (ನಕ್ಷೆಯ ಜಾಗ) ಹಾಗೂ ಪೇಮೆಂಟ್ ಮಾಡುವ ಎಪ್ ಗಳಿಂದ.

ಆದರೆ ಕ್ಯೂ ಆರ್ ಕೋಡ್ ನ ಪಯಣ ಆರಂಭ ಆಗಿದ್ದು ಜಪಾನಿನ ವಾಹನ ಕಾರ್ಖಾನೆಯಲ್ಲಿ. ಕ್ರಮೇಣ ಬೇರೆ ಬೇರೆ ಕೆಲಸಕ್ಕೆ ಬಳಕೆ ಆಗುವದಕ್ಕೆ ಪ್ರಪಂಚದಾದ್ಯಂತ ಆರಂಭ ಆಯ್ತು.

ಕ್ಯೂ ಆರ್ ಕೋಡ್ ಉಗಮ

ಜಪಾನಿನ ಡೆನ್ಸೋ ವೇವ್ ಅನ್ನೋ ಕಂಪನಿಗೆ ಒಂದು ಸಮಸ್ಯೆ ಇತ್ತು. ತಯಾರಿಕೆಯಲ್ಲಿ ವಾಹನಗಳ ಬಿಡಿ ಭಾಗಗಳ ಟ್ರ್ಯಾಕಿಂಗ್ ಅನ್ನು ಇನ್ನೂ ಉತ್ತಮ ಗೊಳಿಸ ಬೇಕಿತ್ತು. ಅದಕ್ಕಾಗಿ ಸಂಪ್ರದಾಯಿಕ ಬಾರ್ ಕೋಡ್ ಗಿಂತಲೂ ಜಾಸ್ತಿ ಮಾಹಿತಿ ಇಟ್ಟು ಕೊಳ್ಳ ಬಲ್ಲ ಕೋಡ್ ಅವಶ್ಯಕತೆ ಯಿತ್ತು.

ಈ ಸಮಸ್ಯೆ ಪರಿಹಾರಕ್ಕೆ ಬಾರ್ ಕೋಡ್ ಗೆ ಪರ್ಯಾಯ ಕೋಡ್ ಹುಡುಕಲಾರಂಭಿಸಿತು. ೧೯೯೪ರಲ್ಲಿ ಟೋಯಟಾ ಕಂಪನಿಯ ಉಪ ಕಂಪನಿಯಾದ ಡೆನ್ಸೋ ವೇವ್ ಕ್ಯೂ ಆರ್ ಕೋಡ್ ಅನ್ನು ಅನ್ವೇಷಣೆ ಮಾಡಿತು.

ಬಾರ್ ಕೋಡ್ ಗಿಂತಲೂ ಉತ್ತಮ

ಕ್ಯೂ ಆರ್ ಕೋಡ್ ಅನ್ನು ಬಾರ್ ಕೋಡ್ ಗಿಂತಲೂ ಜಾಸ್ತಿ ಮಾಹಿತಿ ಇಟ್ಟು ಕೊಳ್ಳಲು ವಿನ್ಯಾಸ ಮಾಡಲಾಗಿದೆ. ಬಾರ್ ಕೋಡ್ ಕೇವಲ ಒಂದು ಆಯಾಮದಲ್ಲಿ ಅಡ್ಡಡ್ಡವಾಗಿ ಮಾತ್ರ ಮಾಹಿತಿ ಹಿಡಿದಿಡಬಹುದು. 

ಆದರೆ ಕ್ಯೂ ಆರ್ ಕೋಡ್ ಎರಡು ಆಯಾಮ (ಟುಡಿ) ಆಗಿದ್ದು ಬರಿ ಅಡ್ಡಡ್ಡ ಮಾತ್ರ ಅಲ್ಲ ಲಂಬವಾಗಿ ಕೂಡಾ ಮಾಹಿತಿ ಉಳಿಸುತ್ತದೆ. ಇದರಿಂದ ಬಾರ್ ಕೋಡ್ ಅಷ್ಟೇ ಜಾಗದಲ್ಲಿ ಹೆಚ್ಚು ಮಾಹಿತಿ ಉಳಿಸುತ್ತದೆ.

ಸಾರ್ವಜನಿಕ ಬಳಕೆ

ಡೆನ್ಸೋ ವೇವ್ ಕ್ಯೂ ಆರ್ ಕೋಡ್ ನ ವಿನ್ಯಾಸ ಹಾಗೂ ವಿಶಿಷ್ಟತೆಯನ್ನು ಸಾರ್ವಜನಿಕರಿಗೆ ಮುಕ್ತವಾಗಿ ನೀಡಲು ನಿರ್ಧರಿಸಿತು. ಇದು ಡೆವೆಲಪರ್ ಹಾಗೂ ಕಂಪನಿಗಳು ಯಾವುದೇ ಲೈಸೆನ್ಸ್ ಖರ್ಚು ಹಾಗೂ ಕಾನೂನಿನ ಸಮಸ್ಯೆ ಇಲ್ಲದೇ ಬಳಸಲು ಅನುವು ಮಾಡಿತು.

ಕ್ಯೂ ಆರ್ ಕೋಡ್ ಜಗತ್ತಿನಾದ್ಯಂತ ಜನಪ್ರಿಯ ಆಗಲು ಇದೂ ಒಂದು ಕಾರಣ.

ಕ್ಯೂ ಆರ್ ಕೋಡ್ ಬಳಕೆ

೧೯೯೦ರ ದಶಕದ ಕೊನೆಯಲ್ಲಿ ಹಾಗೂ ೨೦೦೦ರ ಆರಂಭದಲ್ಲಿ ಜಪಾನಿನಲ್ಲಿ ಕ್ಯೂ ಆರ್ ಕೋಡ್ ಜನಪ್ರಿಯ ಪಡೆದು ಕೊಂಡಿತು. ಮೊದಲು ವಾಹನ ಕೈಗಾರಿಕೆಯಲ್ಲಿ ಬಳಕೆ ಆಗಿ ಆಮೇಲೆ ತಯಾರಿಕೆ, ಸಾಗಣಿಕೆ, ರಿಟೇಲ್ ಕೈಗಾರಿಕೆಗಳಲ್ಲೂ ಬಳಸಲಾರಂಭಿಸಿದರು.

ಇಂಟರ್ನೆಟ್ ಹಾಗೂ ಕ್ಯಾಮೆರಾ ಇರುವ ಸ್ಮಾರ್ಟ್ ಫೋನುಗಳ ಕ್ರಾಂತಿ ಕ್ಯೂ ಆರ್ ಕೋಡ್ ಬಳಕೆಗೆ ಉತ್ತೇಜನ ನೀಡಿತು. ಜನ ಸಾಮಾನ್ಯರೂ ಕೂಡಾ ಕ್ಯೂ ಆರ್ ಕೋಡ್ ಬಳಸುವಂತೆ ಆಯ್ತು.

ಕ್ಯೂ ಆರ್ ಕೋಡ್ ನಮ್ಮ ಪ್ರತಿದಿನದ ಜೀವನದಲ್ಲಿ ಎಲ್ಲ ಕಡೆ ಕಾಣ ಸಿಗುತ್ತೆ. ಪ್ರಾಡಕ್ಟ್ ಪ್ಯಾಕೇಜಿಂಗ್, ಜಾಹೀರಾತುಗಳಲ್ಲಿ,  ಟಿಕೆಟ್, ಬೋರ್ಡಿಂಗ್ ಪಾಸ್, ರೆಸ್ಟಾರೆಂಟ್ ಮೆನು ಹೀಗೆ ಹಲವು ಕಡೆ ಕಾಣ ಸಿಗುತ್ತವೆ.

ಅಂತರಾಷ್ಟ್ರೀಯ ಮಾನದಂಡ

ಇಂದು ಕ್ಯೂ ಆರ್ ಕೋಡ್ ಜಗತ್ತಿನ ಎಲ್ಲ ಕಡೆ ಒಂದೇ ರೀತಿಯ ರಚನೆ, ಅಲ್ಗಾರಿತಮ್ ಅನ್ನು ಬಳಸುವದರಿಂದ ಎಲ್ಲ ಕಡೆ ಯಾವುದೇ ಸಮಸ್ಯೆ ಇಲ್ಲದೇ ಬಳಸಬಹುದು.

ಅಂತರಾಷ್ಟ್ರೀಯ ಮಾನದಂಡಗಳ ಸಂಸ್ಥೆ ಕ್ಯೂ ಆರ್ ಕೋಡ್ ಅನ್ನು ಅಂತರಾಷ್ಟ್ರೀಯ ಮಾನದಂಡ ಎಂದು ೨೦೦೦ರಲ್ಲಿ ಗುರುತಿಸಿದೆ. (ISO/IEC 18004:2015) ಇದು ರಚನೆ, ಎನ್ ಕೋಡ್ ಹಾಗೂ ಡಿಕೋಡ್ ಮಾಡುವ ಅಲ್ಗಾರಿತಮ್ ಗಳನ್ನು ಸ್ಟಾಂಡರ್ಡ್ ಮಾಡುವದರ ಮೂಲಕ ಇನ್ನಷ್ಟು ಜಾಗತಿಕ ಮಟ್ಟದಲ್ಲಿ ಬಳಕೆ ಆಗಲು ಸಹಾಯ ಮಾಡಿದೆ.

ಕ್ಯೂ ಆರ್ ಕೋಡ್ ಗಳು ಕಾಲ ಕಳೆದಂತೆ ಹೊಸ ಹೊಸ ಸೌಲಭ್ಯ ಪಡೆದು ಕೊಳ್ಳುತ್ತಿದೆ. ಡೈನಾಮಿಕ್ ಕ್ಯೂ ಆರ್ ಕೋಡ್ ಹಾಗೂ ಎನ್ ಕ್ರಿಪ್ಶನ್ ಕ್ಯೂ ಆರ್ ಕೋಡ್ ಹೀಗೆ ಸುಧಾರಿತ ತಂತ್ರಜ್ಞಾನ ಪಡೆದು ಹೊಸತನ ಪಡೆಯುತ್ತಿದೆ.

ವಿಶೇಷ ಸೂಚನೆ: ಚಿತ್ರಗಳನ್ನು ಕೃತಕ ಬುದ್ದಿವಂತಿಕೆ ಬಳಸಿ ಮಾಡಲಾಗಿದೆ. ಇವೆಲ್ಲ ನೈಜತೆಯನ್ನು ಪ್ರತಿಬಿಂಬಿಸದು.